Rabu, 06 Juli 2011

Numeralia

3.3 NUMARALIA

 

NUMARALIA atawa KATA BILANGAN sama lawan kata nang dipakai gasan marikin banyaknya maujut (urang, binatang, atawa barang) wan kunsip.

 

3.3.1 NUMARALIA DASAR

 

Numaralia dasar basa Banjar yaitu:

0 nul; 1 satu, asa; 2 dua; 3 tiga, talu; 4 ampat; 5 lima; 6 anam; 7 tujuh, pitu; 8 dalapan, walu; 9 sambilan, sanga; 10 sapuluh; 11 sawalas; 12 dua walas; 13 tiga walas, talungwalas; 14 ampat walas; 15 lima walas; 16 anam walas; 17 tujuh walas, pitungwalas; 18 dalapan walas, walungwalas; 19 sambilan walas, sangangwalas; 20 dua puluh; 21 dua puluh satu, salikur; 22 dua puluh dua, dualikur; 23 dua puluh tiga, talulikur; 24 dua puluh ampat, ampatlikur; 25 dua puluh lima, limalikur, salawi; 26 dua puluh anam, anamlikur; 27 dua puluh tujuh, pitulikur; 28 dua puluh dalapan, dalapanlikur; 29 dua puluh sambilan, sanganglikur; 30 tiga puluh, talungpuluh; 40 ampat puluh; 50 lima puluh; 60 anam puluh; 70 tujuh puluh, pitungpuluh; 80 dalapan puluh, walungpuluh; 90 sambilan puluh, sangangpuluh; 100 saratus; 200 dua ratus; 300 tiga ratus; 400 ampat ratus; 500 lima ratus; 600 anam ratus; 700 tujuh ratus; 800 dalapan ratus; 900 sambilan ratus; 1.000 saribu; 2.000 dua ribu; 3.000 tiga ribu; 4.000 ampat ribu; 5.000 lima ribu; 6.000 anam ribu; 7.000 tujuh ribu; 8.000 dalapan ribu; 9.000 sambilan ribu; 10.000 sapuluh ribu, salaksa; 20.000 dua puluh ribu, dua laksa; 30.000 tiga puluh ribu, tiga laksa; 40.000 ampat puluh ribu; 50.000 lima puluh ribu; 60.000 anam puluh ribu; 70.000 tujuh puluh ribu; 80.000 dalapan puluh ribu; 90.000 sambilan puluh ribu; 100.000 saratus ribu; 1.000.000 sajuta; 20.000.000 dua puluh juta; 300.000.000 tiga ratus juta; 4.000.000.000 ampat miliar; 50.000.000.000 lima puluh miliar; 600.000.000.000 anam ratus miliar; 7.000.000.000.000 tujuh tariliun.

 

7.564.379.132.664

tujuh tariliun lima ratus anam puluh ampat miliar tiga ratus tujuh puluh sambilan juta saratus tiga puluh dua ribu anam ratus anam puluh ampat

 

Dalam rikinan lawan kalipatan lima nang biasanya dipakai ulih para padagang, dipakai jua panyambatan nang lain yaitu pamakaian kata tangah nang kaya di bawah ini:

 

35 tiga puluh lima atau tangah ampat; 40 ampat puluh; 45 ampat puluh lima atau tangah lima; 50 lima puluh; 55 lima puluh lima atau tangah anam; 60 anam puluh; 65 anam puluh lima, tangah pitu; 70 pitungpuluh; 75 pitungpuluh lima, tangah walu; 80 walungpuluh; 85 walungpuluh lima, tangah sanga; 90 sangangpuluh; 95 sangangpuluh lima, kurang lima; 100 saratus.

 

Numaralia dasar ditandai lawan angka Arap

 

3.3.2 NUMARALIA TINGKAT

 

Numaralia tingkat baguna gasan manyataakan urutan wan kumpulan.

 

I panambayan, pamulaan; II kadua; III katiga, katalu; IV kaampat; V kalima; VI kaanam; VII katujuh, kapitu; VIII kadalapan, kawalu; IX kasambilan, kasanga; X kasapuluh; L kalima puluh; C kasaratus; D kalima ratus; M kasaribu.

 

Numaralia tingkat ditandai lawan angka Rumawi atawa angka Arap nang maumpati awalan ka-. Misal: ka-2, ka-3, ka-4.

 

Gasan manyataakan urutan, numaralia tingkat diandak di balakang numina.

Misal: kitab katalu; hintalu kasapuluh.

 

Gasan manyataakan kumpulan, numaralia tingkat diandak di muka numina.

Misal: katalu kitab; kasapuluh hintalu.

 

3.3.3 NUMARALIA PACAHAN

 

Numaralia pacahan diulah malalui panambahan kata pa(r)- di antara bilangan pambagi wan panyambat. Dalam panulisan, pa(r)- dirikitakan ka bilangan nang maumpatinya. Dalam angka, dipakai garis nang mamisahi kadua bilangan itu.

Misal: 1/2 - saparu, satangah, sapardua; 1/10 – saparsapuluh; 1/4 – saparapat; 1/3 – sapartiga; 7/8 - tujuh pardalapan; 10/17 sapuluh partujuh walas.

 

Bilangan pacahan kawa maumpati bilangan dasar.

Misal: 2 ½ - dua satangah; 3 ¼ - tiga saparapat.

 

Bilangan campuran nang kaya di atas gin kawa jua ditulis sacara dasimal.

Misal: 2,5 – dua satangah atawa dua kuma lima; 9,75 – sambilan kuma tujuh lima.

 

3.3.4 NUMARALIA KADA TANTU

 

Gasan manyataakan bilangan nang basipat rilatip, tadapat sakumpulan kata kada tantu nang kaya: banyak, sadikit, sapalih, satuyuk.

 

 

3.3.5 KATA BANTU NUMARALIA

 

Dalam manyataakan bilangan tadapat jua sakumpulan kata nang maumpatinya, nang marupakan bagian langsung sabagai kata bantu numaralia.

 

3.3.5.1 KATA BANTU NUMARALIA UNIT SATUAN

 

Kata bantu numaralia unit satuan yaitu kata-kata nang manyataakan kasatuan panyambat atas banda-banda nang disambatnya.

Barikut ini ialah daptar babarapa kata bantu numaralia unit satuan: ikung, buah, bigi, buting, rinting, hiris, tatak, bilah, lambar, kaping, ikat, dan rapun.

Misal: Itik ampat ikung; Jukung dua buah; Tapih anam lambar.

 

3.3.5.2 KATA BANTU NUMARALIA UNIT WAKTU

 

Kata-kata nang manyataakan satuan waktu dapat dikalumpukakan ka dalam kata bantu numaralia.

Kata bantu numaralia unit waktu: malam, hari, bulan, tahun, jam, manit, wan datik.

Misal: Dua malam; Ampat hari; Tiga jam; Sapuluh manit.

 

3.3.5.3 KATA BANTU NUMARALIA UNIT JARAK

 

Gasan manyataakan atawa manyambat jarak, dipakai satandar pisik barupa tangan, batis, wan gasan rilatip lawan panglihatan. Kata bantu numaralia unit jarak: tangan - jari, tabah, kilan, asta, dapa; batis - langkah; luas - burungan; rilatip – panglihatan.

Misal: Dua jari; Ampat tabah.

 

3.3.6 PANULISAN BILANGAN GANAL

 

Panulisan bilangan ganal di atas satu miliar baiknya mamakai kunsip nang kaya di bawah ini:

 

1012  tariliun (banyaknya nul 12); 1015 kuadriliun (banyaknya nul 15); 1018 kuintiliun (banyaknya nul 18); 1021 siktiliun (banyaknya nul 21); 1024 siptiliun (banyaknya nul 24); 1027 uktiliun (banyaknya nul 27); 1030 nuniliun (banyaknya nul 30); 1033 disiliun (banyaknya nul 33).

 

Misal:

734.638.034.512.354.889.674.658.009.656.345.322

Tujuh ratus talungpuluh ampat disiliun anam ratus talungpuluh dalapan nuniliun talungpuluh ampat uktiliun lima ratus dua walas siptiliun tiga ratus lima puluh ampat siktiliun dalapan ratus dalapan puluh sambilan kuintiliun anam ratus pitungpuluh ampat kuadriliun anam ratus lima puluh dalapan tariliun sambilan miliar anam ratus lima puluh anam juta tiga ratus patangpuluh lima ribu tiga ratus dua likur.

Selasa, 05 Juli 2011

Preposisi

8.2 PARIPUSISI

 

Paripusisi, nang kawa jua disambat kata muka, ialah kata nang diandak di muka kata lain sahingga tawujut parasa. Manurut parigal samantisnya, paripusisi manandai bamacam-macam hubungan arti antara kata di muka paripusisi lawan kata di balakangnya. Manurut parigal sintaksisnya, paripusisi diandak di muka numina, ajiktipa, atawa atparbia sahingga tawujut parasa nang dingarani parasa paripusisiunal. Manurut wujutnya, paripusisi tu ada dua macam yaitu: (1) paripusisi tunggal wan (2) paripusisi majamuk.

 

8.2.1 Paripusisi Tunggal

 

Paripusisi tunggal ialah paripusisi nang tadiri atas satu kata. Wujut paripusisi tunggal kawa bawujut (1) kata dasar, misalnya di, ka, wan (tu)matan, wan (2) kata baapik, kaya salawas, malalui, wan manurut.

 

8.2.1.1 Paripusisi Tunggal nang Bawujut Kata Dasar

 

Paripusisi dalam kalumpuk ini hanya tadiri atas satu murpim. Barikut ini adalah paripusisi nang tamasuk kalumpuk ini lawan cuntuh pamakaiannya.

 

1.      Paripusisi di

Pamakaian paripusisi di dalam kaadaan manurut kalimatnya kawa dilihat pada babarapa cuntuh di bawah ini:

(1)   Kami balajaran di sakulah saban hari.

(2)   Ading balajar mangaji di masigit lawan kakawalannya.

(3)   Inya maandak bukunya di dalam lamari.

2.      Paripusisi ka

Pamakaian paripusisi ka dalam kaadaan manurut kalimatnya kawa dilihat pada babarapa cuntuh di bawah ini:

(4)   Bubuhannya tulakan ka Balikpapan kamarian.

(5)   Ulun handak ka Banjarbaru minggu kaina.

(6)   Tulung ikam antarakan buku ini ka wadah julak!

3.      Paripusisi tumatan

Pamakaian paripusisi tumatan dalam kaadaan manurut kalimatnya kawa dilihat pada babarapa cuntuh di bawah ini:

(7)   Wadai ini diulah tumatan galapung.

(8)   Kami datangan tumatan wadah kai di Sangkulirang.

(9)   Sapatu ini adalah hadiah tumatan nini.

4.      Paripusisi gasan

Pamakaian paripusisi gasan dalam kaadaan manurut kalimatnya kawa dilihat pada babarapa cuntuh di bawah ini:

(10)      Uma maulahakan baju gasan ading.

(11)      Gudang itu sangaja diulah abah gasan manyimpani banda-banda nang kada tapakai lagi.

(12)      Gasan siapa wadai nang ikam ulah itu?

5.      Paripusisi lawan

Pamakaian paripusisi lawan dalam kaadaan manurut kalimatnya kawa dilihat pada babarapa cuntuh di bawah ini:

(13)      Abah lawan uma handak ka wadah kai.

(14)      Ading manulis surat lawan pinsil.

(15)      Inya datang lawan umanya.

6.      Paripusisi hinggan

Pamakaian paripusisi hinggan dalam kaadaan manurut kalimatnya kawa dilihat pada babarapa cuntuh di bawah ini:

(16)      Inya bajalan hinggan pasar lawan adingnya.

(17)      Kami bajajalanan hinggan kampung subalah.

(18)      Bubuhannya balajaran hinggan larut malam.

7.      Paripusisi kacawali/sulih

Pamakaian paripusisi di dalam kaadaan manurut kalimatnya kawa dilihat pada babarapa cuntuh di bawah ini:

(19)      Bubuhannya babacaan di rumah acil kacawali ikam.

(20)      Kacawali rumahnya, saluruh rumah di parumahan ini dicat putih.

(21)      Kakanakan bamamainan di lapangan kacawali anak nang bakacamata itu.

8.      Paripusisi ulih

Pamakaian paripusisi ulih dalam kaadaan manurut kalimatnya kawa dilihat pada babarapa cuntuh di bawah ini:

(22)      Kitap Sabilal Muhtadin ditulis ulih Tuan Guru Muhammad Arsyad Al-Banjari.

(23)      Parusahaan pupuk itu handak dirasmiakan ulih Parasidin Suhartu.

(24)      Buku palajaran bahasa Banjar ini dikaluarakan ulih Balai Bahasa Banjarmasin.

9.      Paripusisi pada

Pamakaian paripusisi pada dalam kaadaan manurut kalimatnya kawa dilihat pada babarapa cuntuh di bawah ini:

(25)      Adingnya tabungas pada kakanya.

(26)      Buku nang ini tabaik pada nang itu.

(27)      Ulahan ikam ini tapanjang sadikit pada ulahan inya.

10.  Paripusisi sagan

Pamakaian paripusisi sagan dalam kaadaan manurut kalimatnya kawa dilihat pada babarapa cuntuh di bawah ini:

(28)      Uma maulah wadai sagan nini di banua.

(29)      Buku ini ditukar abah sagan ikam.

(30)      Sagan siapa ikam maulah rumah itu?

11.  Paripusisi kaya

Pamakaian paripusisi kaya dalam kaadaan manurut kalimatnya kawa dilihat pada babarapa cuntuh di bawah ini:

(31)      Ulun handak baisi harta nang banyak kaya sidin.

(32)      Handaklah ikam sakulah kaya inya?

(33)      Muha anaknya nang panghalusnya bujur-bujur kaya abahnya.

12.  Paripusisi sampai

Pamakaian paripusisi sampai dalam kaadaan manurut kalimatnya kawa dilihat pada babarapa cuntuh di bawah ini:

(34)      Inya bajalan sampai pasar.

(35)      Acil handak mangaji sampai sapuluh lambar.

(36)      Hakunlah ikam bajalan tumatan pasar sampai rumah?

 

8.2.1.2 Paripusisi Tunggal nang Bawujut Kata Baapik

 

Paripusisi dalam kalumpuk ini diulah malalui panambahan apik pada kata dasar parba, ajiktipa, atawa numina nang barupa parapik, supik, atawa kadua-duanya, misalnya baimbai, manuju, manurut, sakitar, sakuliling, salawas, barataan, samuaan, wan malalui.

 

8.2.2 Paripusisi Gabungan

 

Paripusisi gabungan tadiri atas (1) dua paripusisi nang batatai wan (2) dua paripusisi nang bakurilasi.

 

8.2.2.1 Paripusisi nang batatai

 

Paripusisi nang batatai ini tadiri atas dua paripusisi nang andakannya baurutan. Barikut ini cuntuh paripusisi nang batatai: kapada, daripada, ulih karana, ulih sabap, sampai ka, hinggan ka, sampai dangan, dan manuju ka.

 

8.2.2.2 Paripusisi nang bakurilasi

 

Paripusisi nang bakurilasi ini tadiri atas dua palihan nang dipakai bapasangan, tagal tapisah ulih kata atawa parasa lain, misalnya: tumatan … hinggan …, tumatan … sampai dangan …, tumatan … sampai ka …, tumatan … hinggan ka …, tumatan … ka …, tumatan … sampai ….

 

8.2.3 Paripusisi wan numina lukatip

 

Suatu paripusisi kawa jua bagabung lawan dua numina asalkan numina nang panambaian baisi ciri lukatip. Ulih karana itu, kita tamukan parasa paripusisiunal, nang kaya di atas mija, ka dalam rumah, wan tumatan sakitar kampus. Bantuk parasa paripusisiunal ini adalah:

 

clip_image002[4] 

Tumatan bagan di atas kawa dilihat bahwa atas, dalam, wan sakitar marupakan palihan tumatan parasa numinal atas mija, dalam rumah, wan sakitar lapangan wan lain parasa gabungan di atas, ka dalam, wan tumatan sakitar. Sapalihan tumatan kalumpuk numina 1 maupun numina 2 ada nang wajip muncul wan ada jua nang manakatuju. Kalumpuk numina 1 nang kada wajip muncul ialah, misalnya atas wan dalam. Muncul atawa kadanya numina 1 itu dipangaruhin ulih ciri samantik numina 2 nang diminsinya babida-bida. Karana mija, misalnya, baisi diminsi 2 (panjang wan libar), maka di mija baarti jua di atas mija. Cuntuh nang lain:

 

(37)      Andak piring itu di (atas) mija.

(38)      Naikakan barang itu ka (atas) utu.

(39)      Kitap-kitab itu ada di (dalam) lamari.

(40)      Inya mamasukakan kunci itu ka (dalam) laci.

(41)      Lading itu inya ambil tumatan (dalam) kutak.

 

Husus gasan paripusisi gabungan di dalam, bantuk itu bahkan kawa jua batutukaran lawan dalam haja, tarutama lamun numina nang maumpatinya marujuk ka banda nang badiminsi talu. Misalnya:

 

(42)      Baju sidin ada di (dalam) lamari.

(43)      Duitnya disimpan di (dalam) tas.

(44)      Cuntanannya disimpan (di) dalam gudang.

 

Dalam kaadaan nang lain, bantuk nang batutukaran kawa manimbulakan pabidaan arti. Misalnya:

 

(45)      Wayah itu, ulun parahatan di dalam rumah. (di dalam rumah kada sama lawan di rumah)

(46)      Inya tulak ka atas bukit. (ka atas bukit kada sama lawan di bukit)

(47)      Kucing itu malumpat tumatan atas utu. (tumatan atas utu kada sama lawan tumatan utu)

 

Lamun rujukan numina 2 jalas, karana kundisi kalimat atawa situasi, parasa paripusisiunal kawa jua muncul tanpa numina 2. Cuntuh (48) wan (49) barikut masing-masing manampaiakan kundisi kalimat wan situasi nang jalas.

 

(48)      a. Bubuhannya badudukan di luar rumah, sadangkan kami di dalam.

   b. Parahatan bubuhannya bamupakat di dalam kamar, kami bahadangan di luar.

(49)      a. Karana kakurangan kursi, sapalih dudukan di bawah.

   b. Karana pintu muka tatutup, kami masukan tumatan balakang.

 

Barikut ini adalah parasa paripusisiunal nang kawa jua muncul tanpa numina 2 lamun kundisi kalimat atawa situasinya jalas: di muka, di pinggir, di samping, di tangah, ka muka, ka pinggir, ka samping, ka tangah, tumatan muka, tumatan pinggir, tumatan samping, wan tumatan tangah.

Ada jua parasa paripusisiunal nang manyaratakan munculnya numina 2 di samping numina 1 nang kaya cuntuh barikut: di antara …, ka antara …, tumatan antara …, di balik …, ka balik …, tumatan balik …, di parak …, wan ka parak ….

Bandingakan a wan b pada cuntuh barikut:

 

(50)      a.  Pulisi itu talihat di parak rapun jambu nang ada di rumah subalah.

   b.*Pulisi itu talihat di parak.

(51)      a.  Pamain pilim itu bukah ka balik layar.

   b.*Pamain pilim itu bukah ka balik.

(52)      a.  Bubuhannya baganaan di parak rumah sakit.

   b.*Bubuhannya baganaan di parak.

 

Husus parihal tumatan parak, parasa paripusisi ini kada maharusakan munculnya numina 2. Misalnya:

 

(53)      a. Kami malihat kajadian itu tumatan parak rumah.

   b. Kami malihat kajadian itu tumatan parak.

 

Harus diparhatikan jua adanya kamungkinan pabidaan antara di wan di atas, di wan di dalam. Parasa di mija wan di atas mija kawa baarti sama, tagal di lamari wan di atas lamari baisi arti nang babida.

 

clip_image004[4]

8.2.4 Paran Samantis Paripusisi

 

Paran samantis paripusisi dalam basa Banjar ialah gasan pananda (1) hubungan wadah, misalnya: di, ka, tumatan, hinggan, sampai, lawan, wan sampai; (2) hubungan panggasanan, misalnya: gasan, kapada, wan sagan; (3) hubungan pabandingan, misalnya: pada;(4) Hubungan kaumpatan, misalnya: lawan wan baimbai; (5) hubungan alat, misalnya: lawan; (6) hubungan palaku, misalnya: ulih; (7) hubungan waktu, misalnya: hinggan, sampai, wan tumatan; (8) hubungan kasamaan atawa kasasuaian, misalnya: kaya; (9) paran akibat, misalnya: sampai; (10) paran watas ahir, misalnya: sampai wan sampai ka; (11) sabagai pananda paran parihal, misalnya: manganai; (12) pananda hubungan paran asal, misalnya: tumatan, (13) pananda hubungan sabap, misalnya: lantaran, sabap, wan karana; wan (14) pananda hubungan milik, misalnya: tumatan.